ಸಬ್ಬಸಿಗೆ ಸೊಪ್ಪು ಮತ್ತು ಹೀರೆಕಾಯಿ ಭಾತ್

ಸಬ್ಬಸಿಗೆ ಸೊಪ್ಪು ಚಪಾತಿಯೊಡನೆಯಾಗಿಲಿ ಅನ್ನದೊಡನೆಯಾಗಿಲಿ ತಿನ್ನಲು ರುಚಿಕರ ಸೊಪ್ಪು ಮಾತ್ರವಲ್ಲ ಹೇರಳ ಕಬ್ಬಿಣದ ಅಂಶ ಹೊಂದಿರುವುದರಿಂದ ಆರೋಗ್ಯವರ್ಧನೆಗೂ ಸಹಕಾರಿಯಾಗಿದೆ. ಬೊಜ್ಜು ಕರಗಿಸಬೇಕೆಂದರೆ, ಬಾಳಂತಿಯಲ್ಲಿ ಎದೆಯ ಹಾಲು ಹೆಚ್ಚಿಗೆ ಉತ್ಪಾದನೆಯಾಗಬೇಕೆಂದರೆ ಸಬ್ಬಸಿಗೆ ಸೊಪ್ಪಿನ ಪಲ್ಯ ಮಾಡಿ ನೀಡುತ್ತಾರೆ. ಹಾಗೆಯೇ ಸಬ್ಬಸಿಗೆ ಸೊಪ್ಪಿನಿಂದ ಮಾಡಿದ ಹೀರೆಕಾಯಿ ಭಾತ್ ಸಖತ್ತು ರುಚಿಯಾಗಿರುತ್ತದೆ.

ಬೇಕಾಗುವ ಸಾಮಾನುಗಳು :

ಅಕ್ಕಿ 2 ಲೋಟ
ಸಬ್ಬಸಿಗೆ ಸೊಪ್ಪು 2 ಬಟ್ಟಲು
ಹೀರೆಕಾಯಿ 1
ಕ್ಯಾರೆಟ್ 2
ಬೀನ್ಸ್ 1/2 ಬಟ್ಟಲು
ಆಲೂಗೆಡ್ಡೆ 1/2 ಬಟ್ಟಲು
ಬದನೇಕಾಯಿ1 /2 ಬಟ್ಟಲು
ಈರುಳ್ಳಿ 1/2 ಬಟ್ಟಲು
ಟೊಮೆಟೋ 2
ಎಣ್ಣೆ 1 ಬಟ್ಟಲು
ಸಾಸಿವೆ 1 ಚಮಚ
ಕರಿಬೇವು 8 ಎಸಳು
ಈರುಳ್ಳಿ 1 ಉದ್ದಕ್ಕೆ ಹೆಚ್ಚಿದ್ದು
ರುಚಿಗೆ ಉಪ್ಪು
ಒಂದು ನಿಂಬೆಹಣ್ಣಿನ ರಸ
ತುಪ್ಪ

ಮಸಾಲೆ ರುಬ್ಬಲು ಸಾಮಾನುಗಳು :

ಈರುಳ್ಳಿ 2
ಬೆಳ್ಳುಳ್ಳಿ 8 ಎಸಳು
ಬ್ಯಾಡಗಿ ಮೆಣಸಿನಕಾಯಿ 4 ಅಥವಾ ಅಚ್ಚಮೆಣಸಿನಪುಡಿ 1 ಚಮಚ
ದನಿಯಾ ಪುಡಿ 2 ಚಮಚ
ಸಾರಿನಪುಡಿ 1 ಚಮಚ
ಗರಂ ಮಸಾಲೆ 1/2 ಚಮಚ (ಇದ್ದರೆ)
ಚಕ್ಕೆ 2
ಲವಂಗ 3
ಶುಂಠಿ 1 ಇಂಚು
ತೆಂಗಿನತುರಿ 1 ಬಟ್ಟಲು
ಗಸಗಸೆ 1/4 ಚಮಚ

ಮಾಡುವ ವಿಧಾನ :

* ಮಸಾಲೆಗಾಗಿ ಮೇಲೆ ತಿಳಿಸಿದ ಎಲ್ಲ ಪದಾರ್ಥಗಳನ್ನು ಹಾಕಿ ನುಣ್ಣೆಗ ರುಬ್ಬಿ ಇಟ್ಟುಕೊಳ್ಳಬೇಕು.
* ಕುಕ್ಕರ್ ನಲ್ಲಿ ಎಣ್ಣೆ ಹಾಕಿ ಸಾಸಿವೆ, ಕರಿಬೇವು ಹಾಕಿ, ಈರುಳ್ಳಿ ಹಾಕಿ ಫ್ರೈ ಮಾಡಿರಿ.
* ಎಲ್ಲ ಹೆಚ್ಚಿಟ್ಟುಕೊಂಡ ತರಕಾರಿಗಳನ್ನು, ಸಬ್ಬಸಿಗೆ ಸೊಪ್ಪನ್ನು ಹಾಕಿ ಎಣ್ಣೆಯಲ್ಲೇ ಚೆನ್ನಾಗಿ ಹುರಿಯಿರಿ. ಎಣ್ಣೆಯಲ್ಲಿ ಹುರಿದಾಗ ರುಚಿ ಹೆಚ್ಚುತ್ತದೆ.
* ಆಮೇಲೆ ರುಬ್ಬಿದ ಮಸಾಲೆ ಹಾಕಿ. ತೊಳೆದಿಟ್ಟುಕೊಂಡ ಅಕ್ಕಿ, 2 ಬಟ್ಟಲು ನೀರು (ರುಬ್ಬಿದ ಮಿಶ್ರಣದಲ್ಲೂ ಇರುವುದರಿಂದ ನೋಡಿ ಹಾಕಬೇಕು) ರುಚಿಗೆ ತಕ್ಕಷ್ಟು ಉಪ್ಪು, ನಿಂಬೆ ರಸ, ಕೊತ್ತಂಬರಿ ಸೊಪ್ಪು, ಹಾಕಿ ಮುಚ್ಹಿಡಬೇಕು.
* ನಿಂಬೆ ರಸ ಹಾಕುವುದರಿಂದ ಬಾತ್ ಉದುರು ಉದುರು ಆಗುವುದು.
* 1 ವಿಶಲ್ ಬಂದ ಕೂಡಲೇ ಉರಿ ಸಣ್ಣ ಮಾಡಿ ಸರಿಯಾಗಿ 4 ನಿಮಿಷವಾದನಂತರ ಕುಕ್ಕರ್ ಕೆಳಗಿಳಿಸಿಡಿ.
* ಅದು ತಣ್ಣಗಾದ ಮೇಲೆ ಚೆನ್ನಾಗಿ ಮಿಕ್ಸ್ ಮಾಡಿ, ತುಪ್ಪ ಹಾಕಿ ಬಡಿಸುವುದು.
* (ಅವರೆಕಾಯಿ ಕಾಲದಲ್ಲಿ ಅವರೆಕಾಳನ್ನು ಹಾಕಿದರೆ ಇನ್ನು ಚೆನ್ನಾಗಿರುತ್ತದೆ)

******ಗೋಪಿಕಾರವೀಂದ್ರ